Die letzte 5 Täg hei mer in Wellington verbracht.
Im Reisefüherer werd Wellington als schönsti chlini Hauptstadt beschriebe u i muess säge, das chonnt däm wörklech sehr nach, obwou „chlii“ im Verglich mit de Schwizer Städt o wieder relativ esch. 😀
Aber ihr chönd nech grad säuber chli es Biud vo Wellington mache mit de nächste paar Fotine.
Das esch d’Ussicht vom Mt. Victoria uf Wellington. De Mt. Vicotria esch sozäge de Huusbärg vo Wellington u vo dert het me e wunderschöni Ussicht uf die ganzi Region rund um Wellington. 😍
Üses Hotel esch im Gschäftsviertu vo Wellington gsi u so hei mer ned wiit gha zum Parlament, de National Library of New Zealand und no witere wechtigi Gebäude.
Im Parlament hani chönne anere Füherig teilneh u me het einisch meh gmerkt, dass Neuseeland en ehemaligi englischi Kolonie esch. De Inneusbau esch rechtig traditionell englisch u o d’Perücke vo de Parlamentarier hei ned gfäuht. 😀
Ganz en bsundere Charme het d’Cuba Mall, wo zimli im Zentrum vo Wellington esch. Da hets viu Lädeli, Sitzglägeheite u voraum ganz viu härzigi Caffis u Restaurants. ☕️🍪😍
U bi Ablick vo däm Restaurantschiud hani mi grad chli heimisch gfühelt. 🇨🇭☺️
Ou a schöne, alte Chilene manglets in Wellington ned.
Das zum Bispiu esch d’Old St. Pauls Chile u das esch die ersti Chile in Wellington gsi.
Ähnlich wie s’Polybähnli in Züri gets da d’Cable Care, wo einersits zur Vicotria University u andersit uf en andere Ussichtspunkt vo Wellington u em Botanic Gardens fühert.
Nachere Fahrt mit de Cable Car si mer dür de schön Botanic Gardens wieder is Zentrum abegloffe. 🌺
A üsem letzte Abe si mer na amene Weltklass-Cricketspiu, em Derby zwösche de Blackcaps u Australie gsi. 🏏
En wunderbare Abschluss vo üsem Ufenthalt in Wellington u grundsätzlech vo üsere gmeinsame Reise esch die 11-stündig Zugfahrt vo Wellington nach Auckland gsi. 🚂
Mer sie a viu schöne bekannte u unbekannte Orte vo Neuseeland verbifahre u hei die ganzi Reis nomau chönne la revu passiere.
Scho baud heissts o für me weder schaffe. Zwar eschs ned die gwohnti Denkarbet im Büro, defür praktischi Arbet uf de Farm. ☺️
I freue mi wörklech sehr uf die Zyt u bi gspannt was mi aues für Arbet u Erläbnis erwarte tüend. 😀
Genau! Es git auso nid nume s‘ glychnamige Filet, wo wäutsguet isch…. Ou dStadt isch mega schoen und cool 🙂
Du hesch mi no noch Tipps gfrogt. Do waer grad eine: Te Papa – sNationalmuseum zWellington. Isch Interaktiv und einfach sBeste, unterhaltendste, spannendste und lehrrichschte woni je gseh ha! Und erst no gratis;-) Das chasch jo de nach der Farm no mache.
Mir wuensche Dir ganz e guete Start und freue eus uf die wytere Erlaebnis, Kuessli
Gotti Brigi & Boffe