Üse nächste grosse Ziu esch de Milford Sound gsi. Das esch en Teil vom Fiordland Nationalpark in Neuseeland. I bi ja scho vorhär vo dene Dimensione da überwäutiget gsi, aber die Fahrt dur da Nationalpark zum Milford Sound het aues topt. 😍

Trotz em eher schlechte Wätter hei mer üs entschiede en Fahrt ufem Milford Sound z’mache  u mer si met wunderschöne Biuder belohnt worde, wiu desto meh Wasser uf de Berge obe esch, desto meh Wasser flüsst logischerwiis o weder abe. U das gseht de öbe so us. 😍

Underwägs hei mer o nomau Seehönd u Delfine vo ganz nach gseh.😍

Nach Milford si mer witer rechtig Queenstown gfahre. O die Fahrt het immerwieder wunderschöni Panoramas gha.

In Queenstown säuber hei mer en Fahrt metmene Jetboat gmacht. Das esch super gsi, aber ehrlechgseit, hani das gfürchiger gfunde wie Skydive. 🙈

Nach üsere Fahrt mit em Jetboat si mer metere Gondle uf en Bärge ufegfahre u hei dert obe ds Panorama über Queenstown sowie en Fahrt ufmene Sässelilift u ufere Rodelbahn nach neuseeländer Art gnosse.

Nach Queenstown si mer de scho gli a die rägnerischi Westchüste cho. Dert hei mer en Nacht bim Franz Josef Gletscher übernachtet. Am Tag druf si mer de dä o no ga aluege respektiv das, wo me wägem Rage u em Näbu na gseh het…

Uf de Fahrt rechtig Norde hei mer im Puzzle World en Zwüschehaut gmacht. Das esch en Art Museum mit optische Tüschige u emene Labyrinth. Das esch o sehr cool gsi.

En witere Stopp hei mer Nähe Greymouth immene ehemalige Goldgräberdorf gmacht. Me het sich also grad gfühelt wie im wilde Weste. 😃

U so hei mer üs nachmene ebefaus verrägnete Ufenthalt bi de Punakaiki Pancake Rocks (sie gsänd us wie ufgschichteti Pancakes, daher ou de Name ☺️) ufmgacht rechtig Christchurch.
Üse eigentli letzti Ort in Neuseeand.

D’Fahrt vou Gremouth über de Arthur’s Pass nach Christchurch esch nomau wunderschön gsi u het so viu viufäutigi Panorama gha. Die Fahrt hei mer aus Tipp vo mim Gotti becho u i muess säge, es het sich meh wie glohnt. 😍

Desto witer mer üs vo de Westchüste entfernt u de Ostchüste gnöcheret hei, desto schöner ischs Wätter worde, wie meh obe o cha erchänne. ☺️

U so hei mer de Christchurch erreicht, wo mer de am nächste Tag üse gueti Camper hei müesse abgä. Nachdem mer de Camper hei abgä gha, hei mer Christchurch z’Fuess u mit Tram erchundet.

Es esch sehr idröcklech z’gseh wie Christchurch nach dene Erdbebe im Wiederufbau ugseht. Die viele zämegstürtze u renovationsbedörftige Gebäude, provisorischi Baute u Dänkmäler züge nome chli defo, wie die Erdbäbe die Stadt müend troffe ha u sprichwörlech erschütteret hend.

Das esch die auti Cathedral, wo bim Ärdbebe im 2011 esch zerstört worde. Im 2012 esch entschiede worde, dass sie abgrisse werd, aber ufgrund vo Chlagene steit s’Gebäude jetzt set 4 Jahr eifach so da…

Das esch die neui Cathedral, wo aber nome es Provisorium esch, bis me weder en neui bout het.

Das esch es Dänkmal für d’Opfer vom Ärdbebe im 2011.

Das esch en Ichaufsstrass, wo d’Gebäude symbolisch mit Schiffscontainer send baut worde. Uf de ersti Blick schiints vellech speziell, aber es het o sin Charm u passt hervoragend zur Gschicht vo Christchurch.

I bi mega happy, het da de Herbst izog ghaute. Uf dä hani mi sehr gfreut u uf de Südinsle esch er mindistens genauso schön wie ir Schwiz. 😍

Am Samstigabig si mer a Flughafe gange u es wär plant gsi, dass mer am Sonntigmorge rechtig Australie wöred abflüge. 🙈

I säge nome fang so viu, dass mer aktuell immer na in Neuseeland si u no ned wüsse, wenn das mer üsi Reis vo da chöi witerfühere. Uf jede Fau geis üs beidne guet u mer gniesse trotz unplanter Ufenthaltsverlängerig jede witeri Tag da in Neuseeland. ☺️