D’Fahrt nach Picton esch wunderschön gsi. Super Wätter u e sehr schöni Scenery. 😍

In Picton send mer de rächt schnäu ab de Fähre gsi, wiu mer im Tusch gäg e Schwizerschoggi d’Expressline becho hei. 😃

As nächst hei mer Nelson erreicht. Das esch e sehr härzigi Stadt, wo öberau mit Pflanze verziert esch. Das esch leider eher chli ussergwöhnlich für Neuseeland.

In Nelson hani de o min zwöit Skydive buechet. Da s’Wetter so schön gsi esch, hani die Chance grad packt u s’nomou probiert.

I ha de Sprung überem Abel Tasman Nationalpark bi wolkelosem Himmu chönne mache. Er esch eifach fantastisch gsi u es het aues gstumme. I bi froh hets in Taupo ned klappet, sondern hani ne da chönne mache. 😍

Im Abel Tasman Nationalpark hei mer de o en Halt gmacht. Nachdem i ne us de Luft gseh ha, hani ne doch o no wöue vom Bode bestuhne.

Mer si met emene Wassertaxi (wo da öbe ned scho im Wasser esch sondern met em Traktor u aune Lüt drin is Wasser bracht wird!) ar Küste entlang gfahre u si när vore Hautesteu dur de Nationalpark zrugg zum Camper gloffe.
D’Landschaft esch aso vo unde genau so schön gsi wie us de Luft. 😍

Da in Neuseeland gits das Phänomen vo Ebbe u Fluet o u so hei mer es Stück chönne laufe, wo sösch aue s’Meer esch.
So en Ebbelandschaft gseht eifach wunderschön us. 😍

Mer hei den ufgrund vo Tipps chorzfrestig üsi Reiseroute gänderet u si vor West- ad Ostchüste u de zerst a dere entlang gfahre.

Hie es paar Idröck vor Gägend im Inland, wo sich aktuel i ihrere ganze Herbstpracht präsentiert. 😍

Ar Ostchüste esch üsi ersti Stadt Kaikoura gsi. Die esch bekannt für Whalewatching. Leider hei mer vom Festland us kei Wale gseh, defür es paar Seelöie us nächster Nächi u o sösch esch d’Usicht sehr schön gsi. 😍

Denn en witeri Stadt ar Ostküste esch Oamaru. We meh gärn mau en Zytreis wet mache, muess me umbedingt hie häre ga. Die Stadt esch zur Zyt vom Goldrusch baut worde u ehrlechgseit het sie bes hüt no nüt vo dem Charm verlore. 😍

In Oamaru gits o en Pinguinekolonie u es esch ned ussergwöhnlech, we plötzlech mau en Pinguin dür d’Stadt watschlet. Leider esch ned Saison u so hei mer ir Stadt kene gseh, defür si mer zu dere Pinguinekolonie gange u hei chönne zueluege, wie sie bi Dämmerig wieder zu ihrere Kolonie zruggkehrt si. 😍

Ebefaus ähnlich esch Dunedin. O in Dunedin zügt Bispiuswis dr Bahnhof na vo dere Goldgräber Zyt. Aber Dunedin het doch no es bezli meh es Grossstadtfeeling.

Wo mer z’Dunedin gsi si, si mer ire Kathedrale grad per Zuefall anes Orgelekonzert häreflofe. Die Orgele het 3500 Pfiffene u dementsprechend tönt sie au. ☺️

Näbe Dunedin esch o no grad d’Otagohaubinsle. Dert hei mer o no en Tag verbracht. Einersits hei mer die wunderschöni Tier- u Pflanzewäut gnosse 😍

u andersits hei mer s’einzige Schloss in Neuseeland bsuecht.

Nach dene Ostchüstestädt het den d’Southern Scenic Route agfange, wo üs ganz unde ar Insle vor Ost- zur Westchüste bracht het. Die hei mer met Zwüschehaute i mehrere Täg gfahre u i bi einisch meh beidrockt vo däre Wyti u Schönheit i däm Land. 😍

D’Kamera cha die wunderschöne Idröck nome sehr begränzt ifa u glich hani probiert dä chli Teil, wo möglech esch i z’fange.

Hie es paar vo dene Versüech: