Jetzt hani scho sit öbe 2 Woche weder Schwizer Bode under de Füess u chume endlich dezue no min letzte Blogitrag z’mache. 😀

Nach Papua Neuguinea esch uf de Reis nach Malaysia na en Stop-Over vo 3 Tag in Singapore dra gsi.

Nach dem mer am Morge früher glandet si u üses Hotel gfonde hend, hei mer überleit, was mer genau möchtet mache. Mer sind üs de einig gsi, dass es guet wär, we mer grad de ganzi Tag met öbisem usföue, damet mer wäg dr Müedi ned eifach nome chli umetröderle. Drum hei mer üs de für en Bsuech vo de Universalstudios entschiede. U es het sich aso glohnt. Me chonnt sich mängisch wörklech vor wie i de Fiume. 😍

Nachere herrleche Nacht hei mer am nächste Tag Sightseeing mit emene Hop-On-Hop-Off-Bus gmacht. Das het üs o e super Iblick id Stadt verschaft u mer hend die wechtigste Sache gseh.

Das wär vo dem „Schiff“ obenabe.

Pflanzene u ähnlichs Gwächs si i dere Stadt öberau verträte.

Das esch im Botanische Garte in Singapore. Es esch de einzig Botanisch Garde, wo als UNESCO Welterbe gilt.

D’Skyline vo Singapore bi Nacht.

U am dritte Tag eschs scho frühe am Morge witersgange Richtig Kuala Lumpur u vo Kuala Lumpur hei mer de nomau es Flugi uf d’Insle Penang müesse nä, wo mer für guet e Wuche bi mim Gotti u ihrem Ma hei dörfe läbe. Sie hei es Zytli in Kuala Lumpur gläbt, si de aber nach Penang zöglet as Meer.

Das esch de Usblick vo üsere wunderschöne Unterkunft gsi während dere Zyt. 😍

U am Morge hei mer sogar aue Affe direkt vom Baukon us gseh. 😀

In Penang hei mer de o en Stadtrundfahrt met emene Hop-On-Hop-Off Bus gmacht. Hie es paar Idröck.
En Budistische Tämpu

Strassemarkt ufem Wäg zum Budistische Tämpu

U das esch glaub s’schönste Starbucks vor Wäut. Es esch direkt am Meer. Eifach traumhaft. 😍

A emene andere Tag hei mer im Tropical Spice Garden Pflanze us auer Wäut chönne schmöcke u bestuhne.

Einisch het de Boffi, de Ma vo mim Gotti en wunderschöni Inselrundfahrt gmacht, wo er üs na Fläckli zeigt het, wo de Hop-On-Hop-Off Bus ned härefahrt.

Penang het en wunderschöne Rägewaud.

Döfi Vorsteue: Dourian – die beliebtisti Frocht in Malaysia. Aber wenn me vom Weste chont het me die äuä ned gärn. 😂  Sie stinkt nach aute u verfulete Stinkesocke. 😱
U genau drum eschs verbote, die Frucht i de Auto u Hotelzimmer z’ässe. Sie stinkt grussig u s’schlimmste esch, dass me de Gschmack, wenner mau imene Ruum esch, fasch nöm usebringt.

U so gseht die „Frucht“ vo inne us.

Das send aues verschednigi Fischerdörfli uf de Insle Penang.

U es het natürlech o wunderschöni Sandstränd.

In Malaysia gits wunderbari Frücht (abgseh vo Dourian 😳😱) u drum si mer o no uf  ne Tropical Fruit Farm gange.

Passionfruit

Ergend en Öpfusorte 😊

Ananas

U zum Schluss hets na es Buffet met Frücht u en frischpresste Fruchtsaft gä. Die Frücht sind eifach so guet det. I ha soviu gässe, dass i nach es paar Täg ha müesse ufhöre, wiu i ganz es wunds Muu becho ha devo… 🙈

U einisch si mer no uf de Penang Hill, vo wo me e wonderschöni Ussicht uf d’Insle het. Dert obe hei mer üs de o no es Tattoo lo mache, aber natürli nur es Henna.

U die rästlechi Zyt hend mer eifach a üsem Pool oder am Meer gnosse.

Gotti u Boffi i möcht üch nomau vo Härze danke für die schöne Tag mit euch u aues, wo dir üs gä heit. Es esch eifach wunderschön gsi u mer hends mega gnosse. 😘

U de hets nach dene Täg leider scho weder gheisse witerflüge – weder zrugg uf Kuala Lumpur. Mit de beste Insiderstipp u emene wunderschöne Hotelzimmer si mer bestens usgröstet gsi für üsi letzt 2 Täg in Kuala Lumpur.

Üses Hotelzimmer esch eifach top gsi u de Usblick uf Petronas Towers eimalig.

In Kuala Lumpur si mer de de Tipps vo mim Gotti nache u hei o no es betzli gschoppet. 😀

Central Market vo Penang

Nationalmosche vo Malaysia

Central Park vo Kuala Lumpur. 😀

Das esch d’Skybar vo üsem Hotel gsi.
Vo dert us het me ebefaus e wonderschöni Ussicht uf Towers.

U das esch na en Wasser- u Liechterschau gsi.

U so het sich üsi Reis o am Endi zuegneigt. Üse Rückflug esch super gsi u nachere 18-Stunde-Resi si mer de in Chlote acho.

I bi eifach überwäutiget vo au dene Erläbnis, Idröck u Lüt, woni ha dörfe mache, sammle u kenne lere. Es esch es wunderbars Haubsjahr gsi u i ha so viu dörfe lere u nöie Tröim u Visione sammle.
We du gärn no meh vo mim Erläbte wörsch ghöre, de mäud di doch bi mir für es Kaffi. I verzeue sehr gärn nomeh. 😀

Zum Schluss wett i aune danke, wo mi während dere Zyt unterstützt hend, seg das mit Bloggläse, Briefe, Nachrichte, per Skype oder im Gebät.