Am Fritig send mer vo Reathi rechtig Hawera zu üsere nächste Underkunft ufbroche. Für die Fahrt hei mer de Weg entlang em Whanganui River gwähut. Mer hei 79 Kilometer lang kurverichi Strassene, wunderschöni Ussichte uf Berge, Fluss u Wäuder u o es paar Schaf u Chühe uf de Strasse gha. 😀  Leider esch de Fluss weg em Räge i de vergangene Täg e chlii dräckig gsi. 🙈☺️

Nachdem mer bim Motel si acho u usgrumt hei gha, si mer no ane naheglägene Strand ga spatziere u hei dert d’Abesonne gnosse.

Am nächste Tag hei mer üs ufgmacht rechtig New Plymouth, wo mer 2 Täg verbrocht hend. Uf üsere Fahrt hei mer abuzue aghaute u d’Ussicht ufs wiite Meer gnosse.

Nach üsere Akunft in New Plymouth het jede uf sini Art d’Umgäbig uskundschaftet. De Papi via Jogge u i mit em Velo. ☺️

Bis Endi Januar esch in New Plymouth s’Festival of Lights gsi. U so si mer am Abe i Pukekura Park ga die Belüchtig u Deko aluege.
Es esch en wunderschön warme u klare Summerabe gsi u me het chönne meine, dass sich die ganzi Stadt i däm riesige Park versammlet het. Aber es esch trotz de viele Lüt sehr schön gsi. 😍

Am Sunntig hei mer en strahlende Tag gha. Am Morge hei mer d’Stadt u de Strand mit de Velos erchundet u hei de imene Strandkafi es Päuseli gmacht. Chli später si mer am Strand ga bade u nachli später hei mer uf zwe naheglägene Walkways nomau es Velotourli gmacht. Es het sich uf jede Fau glohnt d’Stadt u voraume die Walk- u Bikeways mit em Velo z’entdecke. 😍

Am Abig hets Fish ’n’ Chips met Meeressicht gä.
Fazit vo däm z’Nacht. We di elei fühlesch, muesch eifach öbis z’Esse hole u a Strand sitze. Du bisch scho nach chürzester Zyt vo ganz viu andere umgäh. 😀

A dem Abig het sich de o de Mt. Taranaki (nomau en Vulkan meh 😉) vo sire beste Site zeigt, wo sösch ähnlich wie s’Matterhorn meistens es Chrönli treit.

Am Mäntig hei mer üs zu üsere letzte Underkunft vor üsem längere Ufenthalt in Wellington ufe Wäg gmacht. Nachere längere Autofahrt mit ere churze Pause, hei mers beidi sehr gschätzt, die strahlendi Sonne am Strand z’gnüsse u eifach z’relaxe. 😍