Nachere Nacht in Waitomo hei mer am Mittag i de Ruakuri Cave e Raftingtour gmacht. Mer hei näbst beiidrockende Höhle met Tropfsteine ganz viu Glühewörmli gseh. Es het usgseh wie en Himmu mit gaanz viu Sterne. Just awesome. 😍
Leider het me kei Camera dörfe mitneh u so gits jetzt leider kei Fotis vor Höhli inne sondern nome Ussefotis…

Nach dem Usflug si mer ufbroche zu üsere nächste Underkunft in Turangi, wo mer o weder 3 Nächt verbrocht hei. Einisch meh hend mer en super Underkunft met ere wunderschöne Umgäbig atroffe. 😍

Am nächste Tag hei mer strahlende Wätter grad gnötzt u hei en 3 Stündigi River Rafting Tour ufem Tongariro River gmacht. Über 50 Stromschnellene, e Sprung en Wasserfall dörab u die tolli Kulisse em Fluss entlang, hend au die Tour zumene einzigartige Erläbnis gmacht. 😍

Für de Mittwoch wär en Wanderig im schöne Tongariro Nationalpark plant gsi. Leider het üs de dr Räge en dicke Strich dör d’Rächnig gmacht u so sind mer halt uf Taupo gange, hei d’Stadt agluegt, si chli dür d’Läde gloffe u hei käfelet.

De Tongariro Nationalpark hei mer de am nächste Tag uf üsere Fahrt zur nächste Underkunft in Raetihi na dörquert.
Uf dem Föteli gseht me links de Mt. Tongariro u rechts de Mt. Ngauruhoe. Zwüsche dene Bärge gits e super Wandertour, wo aus schönsti Tageswanderig vo Neuseeland giltet.

U das esch de Mt. Ruhapeu de höchsti Berg vo ganz Neuseeland. Wie meh gseht, het dä o im Summer Schnee u im Winter esch dert es Skigebiet vo Neuseeland. Aui drü Bärge ghöre zum Tongariro Nationalpark u send aktivi Vulkän. 🙈

Wiu d’Strecki zur nächste Underkunft ned ganz so lang gsi esch, hei mer no en Abstecher is Whakkapapa Village chönne mache.
Das esch es Skidorf am „Fuess“ vom Mt. Ruhape u me het vo dert e herrlechi Ussicht uf de Nationalpark. 😀