D’Sonshine Ranch (nei de Name esch ned fausch gschriebe 😉) esch jetzt für die nächste 10 Woche mis Dihei, aso jetzt eigentli nome no für die nächste 8 Wuche.

Zerst verzeu i nech mau chli öbis vor Ranch. Ir Schwiiz wör me die Ranch öbe as Erläbnisfarm beschriebe. 😀
De Grönder esch en Schwizer u het ds leere Landgrundstück im Jahr 1990 gkauft mit em Wunsch Chinder chönne bsunderi Erläbnis ds schenke, wo sie ned so schnäu weder vergässed u ihne vo Jesus u dr Bibu z’verzeue. Sither si ufem Land Outdooraktivitäte, Ställ u Hüser entstande u scho zimli gli nach de Entstehig hend sie die erste Schuelklassene chönne empfange u Rittstundene gä.
Das Grundstück esch eifach riiesig. A eim vo de erste Abe hei mer en 30 minütige Spatziergang uf em Land chönne mache u hei no längst ned aues gseh gha. 🙈

(Ussicht vom Ässruum)

(Ussicht ir Nächi vor Farm)

(Ussicht irgendwo uf dr Farm)

Hüt biete sie immer na klassischi Rittstunde, Horsetreks u die folgende 5 Outdoorktivitäte für Schuelklassene a: Riite, Flying Fox mit Rope Swing, Water Confidence Course, Kayaking u de Climbing Tower. Vo dene 5 chönd sie de im Vorus 3 uswähle, wo sie wend mache.
En Regle vor Ranche beseit, dass jede d’Aktiväte, wo ner demit schaffet, muess usprobiert ha. So ben au i ned verschont bliebe. ☺️

(Flying Fox)

(Kayaking)

(Rope Swing)

Die Schuelklassene sie eigentli de grössti Bestandteil vo mire Arbet. Wenn dSchuelklasse am Morge chonnt, muess i sie empfange u de leit i sie vo Aktivität zu Aktivität, gebe Instruktione, due met ne zMittag esse u probiere eifach ihne en schöne Tag z’schänke.
Am Afang hani denkt, ja das esch ja ned so öbis speziels, wius da in Neuseeland ja so viu Agebot vo Outdooraktivitäte het. Aber i ha de schnäu usegfunde, dass d’Lüt ir Umgäbig vor Ranch eher arm si u sech so Usflug sösch nie chönd leiste. U grad vor es paar Täg hei mer e Schuelklass gha, wo mer de Lehrer verzeut het, dass das ganz en spezieue Tag für die Chind esch, wiu die meiste i Hochhüser ohni Garde u eher arme Verhältnis läbed. U meh hets de Chind wörklech agmerkt, dass sie mega Freud gha hend. 😍
Für viu Chind bruchts chli Muet d’Aktivitäte z’mache, aber ds Strahle nachdem sie’s de gschafft hend u öber sich usegwachse si, esch eifach wunderschön. U drum machts mer au mega Spass hie met dene Chind z’schaffe. 😍

Die restlech Zyt, woni ned tue Schuelklasse betreue, hiufi sösch uf de Farm bir Arbeit met. Da drzue ghört Jätte, Stäu mischte, choche, putze, Müll entsorge, Strücher schniede, Aktivitäte repariere undundund… ☺️

U öbe einisch ir Wuche bechomeni na Rittstunde.
För die, wo sech jetzt fraged, öb i scho abem Ross gheit bi, chani glücklicherwis säge, dass i die Erfahrig noni gmacht han. ☺️

Zeme met mir hei na 5 anderi Lüt uf dere Farm gstartet. Mer aui zäme sie Teil vomene Kurs, wo die Ranch abietet. Am Morge bevor d’Schuelklasse chömed, hei mer aue e Stund, wo mer es Kapitu usmene Buech über s’Thema Jüngerschaft tüe usdusche, meh über Gott erfahre u dür das üsi Beziehig zunenand u zu Gott chönd vertüfe. Am Abig tüend mer aue zeme choche, mached Ämtli u gniessed üses WG-Läbe.

S’Wucheend hei mer zu eusere freie verfüegig u chönd a Strand, ga Lädele, für en Trip ergendwo hi ga oder da si u eifach nüt mache.

Am letzte Wucheend hei mer en Trip an Hot Water Beach u zu de Cathedral Cove underna. Am Samstig si mer an Hot Water Beach gfahre u hei d’Sunne, de Strand u s’Meer gnosse.
Nachmene super Barbeque ufem Zäutplatz, hei mer üs bi Mondliecht an Strand ufgmacht, zum üses Hot Water Pool ga z’grabe. Dä Hot Water Beach het wies de name scho lat la vermuete heissi Quelle u we me dert es Pool grabet, de gits en sehr warme Naturwirlpool. 😍

Vom Moonlightbade hani leider kei Fotis chönne mache…

Am Sonntig si mer nachem Brunch zu de Cathedral Cove ufbroche u hei dert nomau en wunderschöne u heisse Sunnetag gnosse. 😍