Härzlech Wiukomme!

Egau öb di nome d’Biuder intresssiere oder öb’s di intressiert, woni grad was am mache bi, schön nehmsch dir Zyt zum mi Blog z’bsueche. 😀

Am 11. Januar 11.50 Uhr startet mis Abentür mit em Flug nach Hong Kong. Dert wärded min Dad (är begleitet mi ufem erste Teil vo mire Reis) u i en Stopover vo 2 Täg mache, bevor mer denn am  14. Januar nach Auckland witerflüged. Vo Auckland us starte mer denn mitemene Mietauto üsi fasch vierwöchigi Entdeckigstour uf de Nordinsle.

Ab em 8. Februar läb u schaff i de für guet 2 Mönet uf dr Sonshine Ranch, wo ir Nächi vo Auckland esch. Das esch en Erläbnisranch, wo Adventurdays u Lager für Chind abietete.
Abem 14. April bini de für en Monet mit de Stefi (sie begleitet mi für de Rest vor Reis) ufere Campertour quer dör ganz Neuseeland. Die ändet am 15. Mai in Christchurch u vo dert flüged mir witer nach Papua Neuguinea.
Ab Mitti Mai wärde mer de in Papua Neuguinea ufere Missionssation vo üsere Freichile wohne u mithäufe bir Arbeit, wo grad afaut. Wär weiss, vellech liet de o no en Dschungeltour drin. Aber da lö mir eus la überrasche. Uf jede Fau freui i mi sehr druf, mau ganz en anderi Kultur dörfe kenne z’lere.
Am 27. Juni bräched mer scho zur letzte Station uf – Malaysia. Ufem Wäg derthi mached mer in Singapur en Stopover vo zwöi Täg u chömed de am 30. Juni definitiv in Malaysia a. Dert wärde mer für zwöi Woche mis Gotti u ihre Ma bsueche, Zyt mit ihne verbringe u natürli o am Strand nochli Chräft tanke, damit mir für de Heiflug am 11. Juli gwapnet send.

Mini Reis duret aues i auem zimli gnau 6 Mönet.
I freue mi riiesig uf die Zyt u bi mega gspannt, was i aues werd erläbe u was i für Erfahrige werde sammle.
I hoffe, dass du dür dä Blog chli a mir Reis chasch teilha u di mit mir a de gmachte Erläbnisse u de wunderschöne Landschafte chasch freue.  🙂

So etzt wönsch i der viu Spass bim Biuder aluege, Brichte läse u omeschnöige. I freu mi öber jede Kommentar hie im Blog, aber o über jedi Nachricht, wo mi per Whatsapp oder SMS erreicht. 😀

Ganz liebi Grüess vo dert, woni de o immer grad bi.
Naomi