Nachere eher chorze Nacht hend mer eus am Mäntig uf de Wäg rechtig Flughafe Züri gmacht. Nachdem mer s’Gepäck ufgäh und bemene Kaffi na üsi letzte Minute ir Schwiiz gnosse händ gha, hei mer üs richtig Gate E begäh, wo mer de o zimli gli hend chönne istiege.

Nachmene eher rucklige Start hei mer en super Flug ohni grossi Turbulänze gha. Zum Esse het me us verschiednigi Menüs chönne uwähle. Mini Wahl esch uf Gnocchi mit Poulet gfaue u s’esch sehr guet gsi. Nach emene Fium u es paar Stunde Schlaf, esch de o scho gli Zyt fürs Frühestück gsi. Das esch eher gwöhnigsbedörftig gsi. Es het nämli Noudle mit Poulet u derzeu Früchtejoghurt u Confischnitteli gä. Naja wahrschinli hend sie sich scho de Chinesische Kultur apasst gha… ☺️

Uf jede Fau si mer am 6ii am Morge in Ortszit glandet u hei nachdem mer üs bim Imigrationamt gmoldet hei gha, üses Gepck chönne abhole. Mitem Zug send mer vom Flughafe nach Kowloon (esch en Stadtteil vo Hong Kong) u vo dert mit em Bus zum Hotel gfahre. Obwohl mer beidi es Bett hetted nötig gha, hend mer am 7ni natürli nani chönne ichecke. Immerhin hei mer de s’Gepäck chönne dert la u si när trotz Müedigkeit uf Entdeckigstour dür Kowloon. Zerst si mer mau ga nes Kaffi drinke u hei scho nach chürzister Zyt de Kulturunterschied erläbt: zum z’Morge gits im China Nudlesuppe u desto schlürfender u schmatzender s’tönt bim Esse, desto besser esches. 😂 Nach em Kaffi si mer nachli dur Kowloon gloffe, hend aber leider müesse merke, dass s’Läbe da erst gäg die haubi 11 so rechtig afat. Uf die 12i hei mer de scho zrugg is Hotel chönne ga ichecke. Üses Zimmer esch rächt gross u het en schöne Usblick uf Kowloon.

Chum hei mer de Schlüssu gha, bini de o scho im Bett gläge. Mer hei üs geinigt, dass mer bis am 2i en Powernap möched u när nomau id Stadt gönd. De Powernap esch de aber bis am 3 gange u zrugg id Stadt si mer erst wieder am 4ii. 🙈 Mer hei gmüetli nachli Kowloon erforscht, si i paar Läde gange u am Abig hei mer na am Förderband Sushi gässe. Sushi in China muess me o mau probiert ha. Esch sehr fein.

Aber de herrlichst Moment a däm Tag esch gsi, woni nachere Duschi endli is Bett ha chönne. So Reise macht ächt müed. 😴

Wär jetzt denkt, dNaomi esch natürli wieder nome am shoppe, het sich tosche. 😉 Am Zistig hend mer en richtige Sightseeingday gmacht u i has wörklech gnosse. 😀
Gstarted hei mer am Morge in Central Hong Kong. Dert fahred ächt cooli Tram ume.

Vo da us si mer met em Peak Tram (be üs wär das es Zahnradbähnli) uf de Victoria Peak.

De Victoria Peak esch en Berg met de höchste Ussichtsplattform. Vo dert us het mer en wunderschöne Blick uf ganz Hong Kong.

As nöchsts si mer dür d’Hollywood Street (Antique Street) glofe. Das esch wie de Name scho seit, eher en äuteri Strass mit ganz viu chline, coole Läde.

Au grad bi dere Strass esch die achthundertmeter längi Routräppe (esch unterteil in mehreri Stück), wo mer duruf gfahre sind. Das esch au sehr toll gsi, wiu me näb de Routräppe i viu härzigi, chlini Lädeli inne gseh het.

Nachdem mer si abegloffe (dRouträppe fahrt nur ue), si mer met de Metro uf d’Lantau Island gfahre. Dert si mer uf d’Ngong Ping 360. Das esch en 5,7 Kilometer längi Seilbahn. Sie verbindet d’Lantau Island mit em Ngong Ping Plateu. Dert obe hets s’Ngong Ping Village u de grosse Buddha esch o dert.

I däm Village het me sech gfühelt wie im Disneyfium Mulan. Überau hets Chirschblüetene u asiatischi Lampeschirme gha.

U o dr asiatisch Kitsch u Chramsch het ned gfäuht. 🙉🙊

Nachdem mer weder uf dr Lantau Island si acho, si mer met de Metro in Rechtig Haupteil vo Kowloon gfahre, wo mer o no en traditionelle chinesische Chramschmärit gfunde hend. Aso mindistens einisch muess me in China dür so ne Märet gloffe si. Das esch ächt es Erläbnis. 😀

So, morn geit de Ufenthaut hie in Hong Kong leider scho z’änd. Mer wärded morn am füfvorhaubi 4i am Nami in Ortszit rechtig Auckland abflüge. Aber i freue mi o sehr uf Neuseeland. ☺️