Wie gseit s’Kapitu Sonshine Ranch geit jetzt z’end, aber deför fangt es genau so cools Kapitu a – mini Reis mit de Stefi. 😍

Am Donnstig esch sie in Auckland glandet u het leider scho mau rächt lang uf me müesse warte. 🙈
I ha am Morge extra no checkt, öb ihre Flüger pönklich achont u ha de gseh, dass er öbe 2 Stund spöter achont wie plant wär gsi.
Leider esch das vore andere Fluggscheleschaft gsi u so het sie öbe 2 Stund uf mi gwartet. 🙈
Wo mer de endlich uf dr Ranch acho sind, han i ihre d’Umgäbig zeigt u scho gli esch de üse ersti gmeinsami Tag ume gsi.

Am Fritig hei mer de üse Camper dörfe ga abhole. 😍
Nachere eher langwirige Übernahm vom Camper si mer nach öbe 3 Stund wieder uf dr Ranch acho, hei au üses Züg in Camper verstaut u üs uf de Weg gmacht.

Üse Wäg het üs ar Westküste richtig Norde gfühert u mer hei underwägs en wunderschöne Sunset erläbt. 😍

Üsi ersti Nacht hei mer ufmene eher eifache, aber deför sehr schön glägene Campingplatz verbracht. Wius scho donku gsi esch us uf dem Campinglatz kei Strom git, hei mer üse Camper mit Hiuf vore Stirnlampe zumene Bett umgwandlet u so eschs o kes Wunder, dass mer d’Matratze verchehrt hei platziert u dur das en eher herti Nacht gha hend. Aber ou trotz falscher Matratzelag hei mer beidi sehr guet gschlafe u s’Erwache bi somene Usblick u sore Umgängi esch herrlich gsi. 😍

Mer hei de üse Wäg fortgsetzt u hei nach churzer Zyt im Waipoua Forest e Haut igleit. Das esch en Wald mit ganz viu dicke Kauri Bäum, wo für d’Maoris sehr wechtig send.
Uf jede Fau sie mer i däm Waud zumene schöne Ussichtsponkt ufe glofe.

Nach üsem Spatziergang hei mer üsi Autofahrt witergsetzt u hei underwägs zwöi Fraue ufgläse, wo imene Natelnetzloch en Autopanne gha hend. Mer hei sie de bis zu üsem nächste Campingplatz metgno.

Am Sonntig sie mer de vor West- zur Ostküstre in rechtig Paihia ufbroche. Da s’Wetter ned so guet gsi esch, hei mer üs entschiede ned zum Cape ufezga.
Mer sie de a dem Tag no zu de Waitangi Treaty Grounds gange. Obwohu i dert o scho mau gsi be, esch es glich sehr cool gsi. Es het nämli ir Zwüschezyt es neus Museum gä. U zuesätzlich hei mer de no are Culture Performance vo Maoris chönne teilneh. Das esch wörklech sehr idröcklech u intressant gsi.  ☺️

Am Mäntig hei mer bi sehr schönem Wetter en Tour ir Bay of Islands gmacht, wo mer Delfine hei beobachtet, zum „Hole in the Rock“ gfahre si u ufere wunderschöne Insle en chorze Stopover gmacht. De ganz Trip esch eifach wunderschön gsi u het mi einisch meh dankbar gmacht für au das, woni i däm haube Jahr darf erläbe. 😍

Nach däm Trip si mer de scho wieder gäg de Süde abegfahre u hei üsi Nacht in Whangarei verbracht u am Zistig si mer nachmene chorze Stop im Honey Center gäg de Nami wieder uf dr Sonshine Ranch acho.
Mer hei ebe planet gha, dass mer nach üsem Trip in Norde nomau en Nacht uf dr Farm verbringed. I ha nomau ganz en schöni Zyt met mine Frönde chönne verbringe u so han i de am Mittwoch schweren Härzens vo au dene liebe Lüt Abschied gno.
I bi froh, dass i d’Stefi ha gha, i glaub sösch wäri bis jetzt nani vor Ranch weg cho. 🙈

Au wenn en Abschied meistens chli wehtuet u trurig esch, so fougt doch meistens öbis Guets. So ischs emu i mim Fau.
Jetzt heisst für üs: Ab in den Süden!  😀