Die nächste 3 Täg hei mer in Rotorua verbrocht. Mer hei hie es wunderbars Motel gha ir Nächi vor Stadt. Wär scho mau z’Rotorua gsi esch, weiss, dass dert rächt e spezieue Duft ir Luft liet… 😀
Hie gets ganz viu natürlechi Thermalquellene, wo Schwäfugas verdunstet. Entsprechend schmöckt me das o ir ganze Stadt.
Aber nachmene Tag het me sech scho chli a dä Gschack gwöhnt u s’esch scho nöm so schlimm.

Nachere eher lange Autofahrt hei mer a üsem erste Abe in Rotorua d’Stadt na mit em Velo erforscht u mau chli erchondet, wo sich was befindet.

Am Fritig hei mer s’Museum vo Rotorua bsuecht. Das Muesum isch im früherige Badehuus vo Rotorua igrichtet.

De grössti Teil vom Muesum esch de Maoris gwidmet, wiu frühener viu Maoris in Rotorua gläbt hend. No hüt gehts ir Nächi Maori-Dörfer, wo me cha ga aluege. Es esch sehr intressant gsi, chli meh über d’Maoris u wie sie öbe gläbt hend z’erfahre. Leider esch i däm Museumsteil Fotiverbot gsi. Drum gits jetzt da kei Fotis.

Imene witere Teil het me chöne Reste vom früherige Badhus (Badzäuene, Ruherüüm u undererdischi Heizrüm) ga aluege. Das Badhus in Rotorua esch, wius vo viune natürliche Thermalquellene umgä esch sehr beliebt gsi. Leiste hend sich das dazumal aber nome die riiche Britte chönne. Drum esch s’ganze Gebäude o eher im englische Stiu bout.

Nachem Museum si mer dur de Kuirau Park gloffe. Dert hets ganz viu natürlechi Thermalquellene mit heissem Wasser u Schlamm, wo blubberet. U öberau bi dene „Löcher“ verdamft ebe Schwäfugas, wo zimli stinkt. 🙈

Am Samstig wär eigentli plant gsi, in Tauranga e Bootstour zmache u met Delfine z’schwümme. Wius aber so z’höchi Wäue het gha, esch das abgseit worde u so hei mer üse Tag in Rotorua verbracht. Esch uf jede Fau o sehr schön gsi. 😀

Am Morge si mer in Rotura id Souvenierläde u hei gluegt, was es so aues git. Nachher si mer i Redwoods Whakarewarewa Forest gange u hei dört e chlini Wanderig gmacht. Bi dene heisse Temperature esches im Waud rechtig herrlich gsi u o da esch dViufaut vo de Bäum eifach wunderbar gsi. 😍

O Äffli hets i däm Waud gha. 🙉
Die einte chli stärcher u die andere chli schwächer. 😉

(Naja, vellech klappts ja de i 3 Mönet 🙈)

Nach üsem Usflug im Waud hei mer denn am Lake Rotorua badet, relaxt u de Abe la usklinge la.

Am Sonntig si mer de nachem z’Morge gli mau rechtig Otorohanga ufbroche – üses nächste Ziu.
Underwägs hei mer e chline Umwäg über Hamilton gmacht u hei dert de Hamilton Garte agluegt. Das esch e Park mit ganz viu schöne, verschiednige Gartestile u Pflanze. 😍
Hie es paar Impressione.