Am Donnstig esch üsi Reis witergange. Vom Hotel si mer met em Bus zum Bahnhof gfahre, wo mer en Aschlusszug a Flughafe hei gha. Uf üsere Fahrt hei mer nomau „China Live“ erläbt. ☺️

Mer si dür s’Handwärcherviertu gfahre, wo vo neue Wärchzüg bis zum Autschrott aues verchouft wird. 😂

Üse Wäg het o no a Autowerchstätte verbigfühert. Usgseh tüe sie mehoderweniger ähnlich wie bi üs, doch unterscheide sie sich klar in puncto, wo sie d’Autos tüend repariere – ned wie bi üs ir Garage, sondern direkt uf dr Strass. ☺️ U o s’I- u Usstiege us de Büs passiert in China ganz eifach uf dr Strass, egau öb die andere Auto näbedra verbi chönd oder ned. 🙈
Uf jede Fau hei mer üs uf üsere letzte Fahrt dur Hong Kong köstlech über die chinesische Gwohntheite amusiert u mer wärded üse Ufenthalt da uf jede Fau wunderbar in Erinnerig bhalte. 😀

Am 15.25 Uhr het de üse Flüger in Hong Kong abghebt u öbe 11 Stund später send mer guet in Auckland glandet. Nachmene eher komplizierte Ireiseverfahre hend mer zimli baud üses Auto chönne ga abhole u send zu üsere erste Underkunft in Whangaparaoa ufbroche.

D’Fahrt vo Auckland nach Whangaparaoa esch öbe 1 Stund gange u het üs dur e Gägend mit wunderschöner Meeressicht gfühert. Genauso schön esch de o üses Zimmer u d’Sicht vom Balkon us gsi.

Währenddem de Papi sich nach üsere Akunft im Bett echli vom Jetleg erhout het, bin i a Strand abe u has Meer u d’Sonne gnosse. Nach emene Usflug is Städtli, bin i de zimli gli ga schlafe u de Papi het no de Sonneundergang vo eusem Balkon us gnosse.

Am nächste Morge hei mer es feins z’Morge becho u hei üs de scho gli wieder uf d’Reis gmacht. A däm Tag het üs üsi Reis nach Paihia gfühert. Mer sie dür schöni Wald- u Bärggägende, am Meer u a Dörfer verbi gfahre.

Underwägs hei mer immer wieder es paar Zwüschehaut igleit.
Die meiste, aber ned ganz aui Stopps si gwollt gsi. 😉

Stopp in Matakana bei „The Dough Puncher“.
Das esch en super Bäckerei, wo mir im Tripadvisor gfunde hend. 😀

Stopp in Ruakaka für en churze Bsuech am Strand.

Stopp in Whangarei bi de Whangarei Falls.

U schliesslech no de ungwollti Stopp in Warkworth infouge Unfall.
I säge nome: „I bi ned gfahre.“ 😉

Schlussendli si mer de am Abe doch na guet in Paihi acho u hend üses Zimmer im Hotel „Swiss Chalet Lodge“ dörfe bezieh. Wies de Name scho seit, hets sehr schwizerisch usgseh u o so gschöckt. I ha grad ds Gfühel gha, i chöm ines schwizer Bärghotelzimmer ine. ☺️

Am nächste Tag hei mer d’Geburststädt vo Neuseeland bsuecht.
Es Dorf näbe Paihia befinde sich d’Waitangi Treaty Grounds mit eme Museum zur Gschicht vo Neuseeland. Genau a däm Ort esch am 4. Februar 1840 de Vertrag zwüsche de Britte u de Maorihäuptling (Maori si d’Uriwohner vo Neuseeland) unterzeichnet worde u dür das esch Neuseeland zur Brittische Kolonie worde.

S’Huus wo d’Vertragsunterzeichnig stattgfunde het, steit praktisch na im Original dert.

U o drü Chriegsschiff vo de Maori si ugsteut gsi.

Nach em Bsuech im Museum hei mer üs uf de Wäg richtig Kaitaia gmacht, wo üs üsi nächsti Underkonft erwartet het. Es schöns Bed & Breakfast mit emene schöne Pool u Garte.  ☺️