De Mäntig het viuversprächend agfange. Mer hei imene Bed & Breakfast es wunderbars z’Morge mit Müesli, Toast, Ei, Speck u auem, wo sösch na zumene guete z’Morge ghört becho. Nach em z’Morge hei mer üs de vouer Vorfreud uf nach Cape Reinga (nördlechst Punkt vor Nordinsle) gmacht.
So hettis söue usgseh 😍

Scho wo mer abgfahre si, eschs eher bewöuckt gsi. Aber gmäss em Wäterradar hetti überem Cape kei Räge söue si. Desto länger u höcher mer gfahre si, desto meh si mer aber leider i Räge u i Näbu cho. Wo mer de ganz obe uf em Cape Reinga si acho, hets de leider so usgseh 🙈

Nachdem mer de pflotschnass weder bim Auto gsi si, hei mer üses Picknick haut is Auto verschobe u hei üs när scho gli weder uf de Wäg rechtig nächsti Underkunft gmacht.

Naja, immerhin esch das chli e Trost für üch dihei ir Schwiz.
O mer in Neuseeland hei ned nome Sunneschin. 😉

Defür hei mer einisch meh e super Underkunft gha. E rechtigi Backpacker Accomodation direkt am Meer. De Rest vom rägnerische Tag hei mer met anderne Reisende u Chartespiu verbracht. Es esch sehr cool gsi, mau mit anderne chli uszdusche.
Uf de Abe het de d’Sunne glich na füregluegt u so hei mer üses z’Nacht am Strand bi Sonneschiin chönne gniesse. 😍

De Wäg zu nächster Underkunft hei mer gmüetlech gno u immer wieder chli aghaute. Einisch hets e Haut gä, wiu mer uf d’Fähre hei müesse warte, denn chli später si mer imene schöne Strandkaffi igkehrt u nachli später hei mer de na im Waipoua Forest aghaute u e Spatziergang zu de grosse Kauri Bäum gmacht. Das si Bäum, wo bsonders für d’Maoris vo grosser Bedütig si u wo scho öbe 2000 Jahr aut si. Dementsprächend deck u gross si sie o gsi. 😀

Nachere witere Autofahrt vo öbe ere Haubstund is Nirgendwo use, hei mer es üses Hüsli mit emene wunderschöne Usblick atroffe.

Vo üsem Hüsli us eschs nome öbe 10 Minute Fuesswäg gsi zum Lake Taharoa. De restlich Nami hani am See mit Bade, Sönnele u Läse verbacht. 😍

Ei negative Punkt hets aber, we me d’Unterkunft ir Pampas use het. Für zum nächste Tankstöueshop fahrt me schnäu mau 20 Kilometer u we de dä na zue het, fahrt meh sicher nomau 10 Kilometer zur nächste Ichoufsmöglechkeit, was i eusem Fau de nächsti Campingplatz gsi esch… 😂 So hei mer üs uf de Wäg gmacht u si ungfähr nachere Stund Autofahrt mit eme Pack Teigware u ere Tomatesauce wieder bi üsem Hüsli acho.
Eis esch üs de nach däm Usflug klar gsi. Sobaud mer amene nächste Supermarkt verbichömed, chaufe mer Spagetthi u Tomatesauce uf Vorrat. ☺️

Gesagt – Getan. Am nächste Tag si mer de nachem z’Morge zur nächste Underkunft ufbroche u hei bim nächste Supermarkt Vorrat iikouft. ☺️

Uf üsere Fahrt het sich Neuseeland einisch meh vo soo viune wunderschöne u verschiednige Fassetene zeigt. Einisch het me e Ussicht wie ir Schweiz, de liet hinter dr nächsten Kurve e Waud, wo usgseht wie dr Dschungel u nomau e Kurve witer, gseht me scho weder sMeer. So verschiede u eifach wunderschön. 😍

Nachdem mer am spätere Nami bi üsere nächste Underkunft – e Wohnig ufere Farm – si acho, hend mer nachli s’Wetter u d’Ussicht gnosse u de später am Abe na kochet.
Ihr chönd nech ja dänke, was es gä het. 😀

De kröndend Abschluss vo däm Tag esch de de schöni Sonneuntergang gsi, wo mer hei chönne beobachte. 😍

(kei Angst, das esch ned üsi Wohnig gsi. 😉)